LEKUKOTZAK
Nafarroako hainbat LGTBI+ kolektibotan militatu duten edo militatzen ari diren hamar laguni egindako elkarrizketa sakonen sekuentziak dituzu eskuragarri. Horrez gain, beraien testigantzen laburpenak ere aurkituko dituzu, denbora lerroan zehar.
IVAN GARDE FERNÁNDEZ
01 Hastapenak aktibismoan (gaztelaniaz)
Ez zen modu kontzientean identifikatzen emakume transekin. Hasiera batean emakume homosexuala izanen zela uste zuen, argi baitzuen ezin zela emakume heterosexuala izan. Aktibismoaren bidez lesbianengana hurbildu zen. Gogoan ditu Nines, Amparo, Mª José Urra, Arantxa Garjón eta beste batzuk. Non elkartu ohi ziren esan digu.
02 Lumatzaren sorrera, M8ak eta E28ak (gaztelaniaz)
Taldea elkartu eta izen baten bila hasi ziren, Lumatza; izen horren zergatia azaldu digu. Pasadizoren bat kontatu digu. M8etan emakume feminista guztiekin elkartu ohi ziren. 80ko eta 90eko hamarkadetako E28ei buruz hitz egin du. Oso berandu arte ez zuten elkarrekin festarik egin EHGAMek eta Lumatzak. Jaiak non egiten zituzten kontatu digu, Loretxean eta Euskal-Jai frontoian, kasu baterako.
03 Lehendabiziko emakume transak eta garai hartako ideologia bolleroa (gaztelaniaz)
Gasolindegi batean lan egiten zuen garaian emakume trans asko ezagutu zituen. Oso testigantza gogorrak entzun zituen, eta horrek bere benetako nortasuna onartzea oztopatu zion. Haurtzaroan bere genero adierazpenaren inguruan izandako prozesu eta oroitzapen horiek azaldu dizkigu. Aktibismoan, konturatu zen emakume homosexualen ideologia ez zetorrela bat berak bizitza ulertzeko zuen moduarekin. Azaldu digunez, orain patriarkatu deitzen zaion horri falokrazia deitzen zitzaion orduan.
04 Kattalingorriren sorrera eta nortasuna onartzea (gaztelaniaz)
18 urte zituenean ekin zion aktibismoari. 2000. urtearen inguruan, azkenik, Lumatza eta EHGAM elkartu eta Kattalingorri sortu zuten, eta Ivanek Iruñera itzuli zenean, 33 urte zituela, ezagutu zuen elkarte hori. Azaldu digu nola ezagutu zuen lehen mutil transa eta zer piztu zion jazoera horrek. Adierazi digu garai hartan trans izateari buruzko informazioa bilatzen hasi zela eta egoera zer-nolakoa zen. Emakume transen sufrimendua transmititu digu.
05 Iruñeko aktibismo anitza (gaztelaniaz)
Lumatzako eta EHGAMeko militantziak beste militantzia korronte batzuekin bat egiten zuen hein handi batean. Garai hartako aktibistak anitzak zirela eta borroka askotan parte hartzen zutela deritzo; beti pertsona berberak zeuden sartuta gauza guztietan.
06 Lumatzaren aldarrikapenak eta erasoak (gaztelaniaz)
Lumatzakoek eskubide berdintasuna ikusarazi eta aldarrikatu nahi zuten. Garai hartako desparekotasun egoeraz eta eraso homofobo eta matxistez mintzatu da.
07 Garaiko beste kolektibo batzuk eta harremanak (gaztelaniaz)
80ko eta 90eko hamarkadei dagokienez, ildo berean lan egiten zuten kolektiboak EHGAM, Gehitu, Lumatza eta beste kolektibo feminista batzuk ziren, hala nola Andrea, gaur egun Lunes Lilas deritzon elkartea. Zabaldiz, Sarez eta Hiesaren Aurkako Batzordeaz ere hitz egin digu, eta guzti-guztiek kidetasun handia zutela nabarmendu du. Nafarroako herrietako jende asko ez ezik, Euskal Herriko leku guztietako pertsonak ere etorri ohi ziren Iruñera asteburuetan. Gertuko –Euskal Herriko eta Errioxako– kolektibo lesbikoekin baino ez zuten harremana.
08 Laguntza sareak (gaztelaniaz)
Bere prozesuan zehar, ahal izan zuen pertsona guztien babesa bilatu zuen. Iruñean pertsona transak bilatu zituen eta, geroago, Madrilen eta Bartzelonan hasi zen bila. Interneten ere bilatu zuen laguntza. Bere laguntza sareari buruz hitz egin du. Iruñean ez zegoenez baliabiderik, Kattalingorrin sartu zen eta Ilota Ledo sortu zuen orduan.
09 Las Jornadas Científicas sobre Transexualidad
Andraizekoek jardunaldi batzuk antolatzea onartu zuten, eta Ivanek baldintza jakin batzuk jarri zituen; baldintza horiek onartu egin zizkioten. Farmazia laborategiekin hasi ziren lan egiten; Andraize, Abiatze eta Gozamenez elkarteetako zenbait pertsona aipatu dizkigu. Boluntario talde bat osatu zuen, eta bakoitzak bere gaitasunen arabera egiten zituen ekarpenak jardunaldiak osatzeko. Jardunaldietara joan zen profesionalen taldeari buruz hitz egin digu.
10 Legearen formulazioa eta gose greba (gaztelaniaz)
Jardunaldi haiek egin ondoren, PSOEk irekitasunez erakutsi zuen bere babesa. Jardunaldien ondorioz, aldarrikapen jakin batzuk bildu eta lege proposamen bat idatzi genuen. 2006an gose greba egin zen. Hainbat elkarte bildu ziren, estatu mailako trans lege bat negoziatzeko. Parlamentuan aurkeztu ziren, beren lege ideia proiektatu eta defendatzeko; Esquerra eta IU alderdiek baino ez zuten sostengatu. Une hartaz hitz egin du Ivanek, legearen gorabeherez eta PSOEk ez ziela lagundu.
NORA GÓMEZ CARRIÓN
01 Aktibismoan 2015etik (gaztelaniaz)
2015az geroztik hona, oso aktiboa izan da Kattalingorrin eta Dekumas LBT elkartean; gaur egun, izan ere, lehendakaria da. 2009an, transen EnFemme taldearekin jarri zen harremanetan, eta haiek bisitatzen hasi zen. Gurekin partekatu ditu bere bizitzari eta emakume gisa izan zuen garapenari buruzko hausnarketak.
02 Esperientzia psikologo batekin (gaztelaniaz)
Emazteari bere sekretua jakinarazi ondoren, terapia egitera joatea erabaki zuten, baina psikologoak “desioak” sendatu nahi izan zizkion; hanka-sartze latza izan zen. Terapia oso esperientzia txarra izan zen Norarentzat, alor horretan prestakuntza falta baita; behar-beharrezkoa da LGTBI+ gaietan espezializatzea.
03 Hastapenak Kattalingorrin (gaztelaniaz)
2011n, Iruñean LGTBI aktibismoa Aldapa kaleko lokal batean zegoen. Nora psikologo batekin batera hasi zen lanean Kattalingorrin. Une hori testuinguruan kokatu eta elkarteak aurrera ateratzeko egiten zuen lanaz hitz egin digu.
04 Aldapa kaleko lokalaren amaiera eta Kattalingunearen hasiera (gaztelaniaz)
Kattalingorrin eman zuen azken etapan oso inplikatuta egon zen, baina, azkenean, lokalaren alokairua ordaintzeko arazoak izan zituzten. Orduan, elkartea utzi zuten. Denboraldi baten ondoren, presidente gisa itzuli zen. Urte horiei buruz eta bizitako prozesuei buruz hitz egin digu, adibidez, Kattalingune lortzeko bizitakoaz.
05 8/2017 Foru Legeranzko prozesua eta Harrotu (gaztelaniaz)
2017an, LGTBI+ kolektiboaren aurkako diskriminazioa galarazteko lege proiektua aurkeztu zenean, bilera asko egin zituzten hura talde politikoekin lantzeko eta artikuluak berrikusteko. Legea ekainean onartu zen, eta hori baino lehentxeago, Harrotu elkartea inauguratu zen.
06 Lagunartekotasuna (gaztelaniaz)
Kattalingorrira iristean izan zituen lehen adiskideak asko lagundu zioten; izan ere, adiskidetasuna baino ez zioten eskaini, bere horretan onartzen zutelako, zen bezalaxe. Elkartean lan egiteko gogoz bete zuen lagunartekotasun horrek. Garai hartan oso trans gutxi zeuden. Pasadizoren bat kontatu digu.
07 Dekumak eta lesbianismoa (gaztelaniaz)
Elkartearen helburu nagusia da emakume homosexual, trans eta bisexual guztiek armairutik lasai ateratzeko indarra eta tresnak izatea eta gune seguru batean daudela sentitzea. Deskribatu egin digu zer den beretzat lesbiana izatea.
08 Heterosexualitatea (gaztelaniaz)
Heterosexualitatea genero binarismoan funtsatutako gisa definitzen du: gizona eta emakumea Bere hitzetan, hetero batek ez daki ezer aniztasunari buruz, desinformazioa dela eta. Bizitza heterosexuala izateak mundura zabaltzea eta beste gauza batzuk ezagutzea oztopatzen duela adierazi du.
09 LGBTI+ mugimenduak gizarteari egindako ekarpenak (gaztelaniaz)
LGBTI+ mugimendua oso lagungarria izan da gizartea askeagoa izan dadin lortzeko, jendeari liskarretan sartu gabe ateratzea ahalbidetu baitio aktibismoak. Horren inguruko gogoetak partekatu ditu gurekin. Esan du 2010etik 2020ra bilakaera oso handia izan dela.
ALIZIA IZAL ELORZ
01 Lehen kontaktua LGTBI munduarekin Basaburuan (gaztelaniaz)
1980an Madrilera joan zen indigenekin lotutako gaietan lan egitera eta 83an Latinoamerikara joan zen. 17 urte inguru zituenean izan zuen bere lehen kontaktua LGTBI kolektiboarekin, Basaburuan egindako topaketa batean, 75ean, gutxi gorabehera. Talde horretan entzun zuen lehen aldiz homosexualitateaz. Topaketa horrek arrastoa utzi zion. Hura izan zuen kolektiboarekin izandako lehen kontaktua eta haren existentziaren berri izan zuen lehen aldia. Handik aurrera disimulurik gabe mintzatzen hasi zen horretaz. Gizonek ez dute sekula Alizia erakarri. Aurkikuntza horretatik aurrera, esparru horretako jendea ezagutzen hasi zen, testuinguru nahasi batean bazen ere.
02 Nafarroako Gazteen Topaketa Arraratsen (gaztelaniaz)
Nafarroako Gazteen Topaketetan izan zen; izan ere, Arraratseko baserri batean, Basaburuan, alderdi politiko eta sindikatu batzuek klandestinitatean antolatu zuten gazte topaketa horrek ahalbidetu zuen. Ez daki nola antolatu zuten, baina gogoan du bera han egon zela. Militante sozialak, politikoak, sindikalak eta ikasleak ziren horra bertaratu zirenak.
03 Homofobia (gaztelaniaz)
Une sozial hartan homofobia transmititu egiten zen, eta sexualitatea, ordea, deskubritzeko grina baino ez zen. Homosexualitatea ezin zen erakutsi, politikoki jazarri egiten baitzen. Gaur egun, aski ongi daki garai hartakoa homofobia zela: dena homofoboa zen. Madrilen kontzientzia handiagoa hartu zuen errealitate horretaz.
04 Eliza katolikorako mezua (gaztelaniaz)
Erakunde erlijiosoari zera esan behar dio, apaiz izaten jarraitzen duela, oraindik presbiterioaren agindua baitu, eta hori guztia, emakumea izanik, fisikoki, mentalki eta instituzionalki. Eliza hierarkiekin eta elkarteekin hitz egin nahiko luke, irekiagoak izan daitezela eskatzeko. Historian dibertsitatearen aldeko norbait egon bada, norbait feminista, pertsona hori Jesus Nazaretekoa da.
05 Militantzia urteen bilakaera eta 2017ko Foru Legea (gaztelaniaz)
2011ra atzera egin eta Kattalingorriko lanaz hitz egin digu, Aldapa kaleko 3. zenbakian. Lourdes Lasarte aipatu du. Harrez geroztiko bilakaera historikoaren ibilbide bat egin du. LGTBI+ Pertsonen Berdintasun Sozialari buruzko 8/2017 Foru Legeari buruz mintzatu da eta LGTBI kolektiboekin batera landu zutela aipatu du. Legea hobetzen ahal da, baina aitzindaria da Europa osoan. Gaur egun, estatu lege bat lortzera bideratzen dituzte euren ahaleginak, eta horri buruz hitz egiten du. PSOEri buruz ari da.
06 Lortutako mugarriak (gaztelaniaz)
Lorpenik garrantzitsuenetako bat Kattalingorriren agerpena izan zen, baita 90eko hamarkadan Lumatza, EHGAM eta antzeko beste kolektibo batzuk garatu izana ere. Baita 2009ko Trans Legea eta 2017ko LGTBI Legea ere.
07 Aniztasuna (gaztelaniaz)
Kolektiboko jendearen artean egiten ziren esloganei eta jai transbollomarikei buruz hitz egiten du. Batzuetan gauza batzuk galdu baina berriak sortzen dira. Aniztasuna gero eta normalizatuago dagoela kontatu digu, eta hori gauza ederra dela, gizadia aberastu egiten baitu. 2021eko E28a eta kulturen mestizajea aipatu ditu.
08 Kanpainak eta une gorenak (gaztelaniaz)
Chrysallis eta Naizen elkarteak sortu zirenekoaz ere hitz egin digu, HazteOír autobus transfoboaren aurkako kanpainaz, 2017an Gazteluko Plazan egin zen armairuaren kanpainaz, Atrévete dokumentalaz eta homosexualen eta transen artean armairutik ateratzeak dituen desberdintasunez.
09 Une tristeak (gaztelaniaz)
Ekai Lersundik bere buruaz beste egin zuenekoa gogoratu digu, kolektiboarentzat hain mingarria izan zen une hori. Azpimarratu du jazoera hori erakundeen, gizartearen eta kolektiboen erabateko porrota dela. Transen munduan suizidioen ehunekoa % 50ekoa da. Egoera honen errudunez hitz egin digu Aliziak. Aniztasuna ez onartzeko egoerari eta eta horrek dituen ondorioei buruz hausnartzen jarraitzen du, aurreko bideoan aipatutakoaren ildotik. Bere errealitatearen zailtasunaz hitz egiten du, ezagutzeaz, pertsona transak hobeki ulertzeko. Gogoeta egiten du sektore feminista trans-baztertzaileaz –TERF delakoaz–, beldurraz, ezjakintasunaz eta botere borrokez.
10 Feminismo trans-baztertzailea (gaztelaniaz)
Feminismoak arazo handia du errealitate txikiak argi ezagutzeko, mugimendua askotarikoa baita. Arazo nagusia matxismoa da, eta onartu egin beharko lituzkete gutxiengoak, hala nola emakumezko migratzaileak, emakume transak eta prostitutak. Horri guztiari buruz duen iritzia azaldu du.
Aliziarentzat militantzia funts-funtsezkoa izan da. Azpimarratu du segurtasun gutxien izan duenean izan dela zoriontsuen. Militantziak irakatsi dio zoriona ez datzala edukitzean, izatean baizik.
TXARO BERZOSA BEJARANA
01 LGTB kolektiboa eta mugimendu feminista (gaztelaniaz)
Lagunen artean heterosexualtasunaren ikuspegitik hitz egiten zen. Erabiltzen ziren terminoak «marikoi», «tortillera» eta antzekoak ziren; geroago, LGTB mugimenduak aldarrikatu egin zituen hitz horiek. EHGAMen bidez izan zuen bere lehen harremana LGTB mugimenduarekin, Gipuzkoan eta Bizkaian. Txaro Tuterako Emakumeen Asanbladan hasi zen 1979an eta 1981ean lehenengo kartelak atera ziren. Mugimenduaren barruan zer-nolako garapena izan zuen kontatu digu, eta pasadizo batzuk ere esan dizkigu. Iruñean 1983an egin zen lehen manifestazioa.
02 Feminismoaren eta LGTB mugimenduaren hastapenak 1 (gaztelaniaz)
Frankismoaren garaian egoera oso gogorra zen feminismoari zegokionez; arbuio handiko urte haiek deskribatu dizkigu Txarok. Mito asko zeudenez emakumeen inguruan, aldarrikapen ugari egin behar ziren, hala nola emakumeen sexualitatea, abortua, emakumeen gorputza, indarkeria matxista eta beste hainbat alderdi.
03 Feminismoaren eta LGTB mugimenduaren hastapenak 2 (gaztelaniaz)
Garai hartan, arazoak sortu ziren, adibidez, feminista heterosexualen eta feminista lesbianisten artean, baita aurreiritzi femmefoboak ere feminismo lesbianistaren barruan eta genero adierazpenari zegokionez. Txaroren aburuz, feminismoa mugimendu autokritikoenetako bat izan da. Feministaren bilakaerari buruzko zenbait hausnarketa egin ondoren, gaurkotasunarekin lotu du mugimendua.
04 Feminismoaren eta LGTB mugimenduaren hastapenak 3 (gaztelaniaz)
Gizarte Arriskugarritasunaren Legea indarrean zegoen; are gehiago, LGTB mugimendua jada legeztatuta zegoen deuseztatu zenean. OMEk geroago despatologizatu zuen homosexualitatea. Aldarrikapenak despatologizazio hori lortzearekin zeuden lotuta funtsean. Iruñeko lehen E28a eta garaiko kontsignak deskribatu dizkigu. Kalean eskuorriak banatu zituztenekoa kontatu digu, eta jendea begiratzera irten ohi zela, manifestatzera baino gehiago.
05 Feminismoa, lesbianismoa eta EHGAM Nafarroa (gaztelaniaz)
Tuteran ez zen mugimendu lesbianista autonomorik izan, feminista lesbianista guztiek feminismoan militatzen zuten. Iruñeko Koordinakunde Feministan lesbianismoani buruzko batzorde bat antolatu zen eta horrela sortu zen, hain zuzen, EHGAM Nafarroa. Batzarra mistoa zen 1981ean, eta arrakasta izan zuenez, lehen manifestazioa antolatu zen.
06 Trans mundua (gaztelaniaz)
Garai hartako trans pertsonekiko arbuioari buruz hausnartuz, kolektibo feministaren barruan ere gaitzespen hori zegoela komentatu digu. Garai hartako marxismoarekiko harremana korapilatsua zen; adibidez, lesbianismoa «bizio burgesa» zela esaten zuten, eta gogo gutxi zegoen ezkerraren barnean gaiak mahaigaineratzeko. Tierno Galvánen adierazpen homofobo batzuk ere aipatu ditu.
07 Garaiko ezkerrarekiko harremana (gaztelaniaz)
LGBT kolektiboaren eta ezkerraren arteko harremanari buruz hitz egin du. Hasieran, harreman hori zaila zen, eta azaldu digu, adibidez, LGTB pertsonei ez zietela uzten gazte taldeekin lan egiten, eragin txarrekotzat jotzen baitzituzten. Ezkerreko erakundeetan feminismoa agertu zenean lan handia egin zen alor horretan.
08 Jardunaldi feministak eta LGBT mugimendua (gaztelaniaz)
Jardunaldi horietan bertan, erakunde feministen barruan militatzen zuten bollera taldeak zeuden, baita lesbiana autonomoen taldeak ere. Berrikuspen bat egin du eta kontatu digu urteak igaro ahala jardunaldietara zein formatutan joan ziren; izan ere, bollerak Nafarroako EHGAMetik atera eta Koordinakunde Feministaren barruan talde autonomo propioa sortu zuten. Orain arteko errepaso historikoa egiten du.
09 Zapalkuntza sistemak eta feminismo beltza (gaztelaniaz)
Polemika bakoitzaren barnean, sistemarik zapaltzaileenaren adibideak jartzen ziren, baina patriarkatua eta kapitalismoa nabarmentzen ziren beti, horiexek hartu ohi baitziren zapalkuntzak eragiten zituzten sistema nagusitzat. Geroago, bestelako ardatzak erantsiz joan zitzaizkien sistema horiei, hala nola heterosexualitatea. Feminismo beltzaren eta mugimendu indigenaren ekarpenei buruz ere hitz egin du.
10 EHGAM (gaztelaniaz)
EHGAMek bilerak egiten zituen, 15 egunean behin, Koordinakunde Feminista eta Eguzki Irratia etxe librea zeuden lokalean. 1981an hasi ziren, gutxi gorabehera, eta pare bat urte geroago antolatu zuten lehen manifestazioa. 3 urte geroago, EHGAM eta Lumatza banandu egin ziren, baina ekainaren E28a elkarrekin egiten jarraitu zuten, Koordinakunde Feministarekin batera. Neska trans bat zegoen, eta 4 lagunek baino ez zekiten transa zela.
XABI SANCHEZ GORONAETA
01 Mugimenduen arteko aliantzak (gaztelaniaz)
Iruñean mugimendu autonomo aktibo bat zegoen eta lotura handia zuen mugimendu horrek Londresko okupazio mugimenduarekin. Xabi Londresera joan zen, uda igarotzera, squat mugimenduaren barnean, eta konturatu zen bere sentimendu eta bizipenek ibilbidea zutela mugimendu autonomoaren barnean, ezkerra lozorroan baitzegoen alor horretan. Eta, orduan, ahaldundu eta zentratu egin zen eta sexologia aukeratu zuen.
02 Ezker abertzaleko maskulinitate ereduak (gaztelaniaz)
Ezker abertzaleko gazte mugimenduan izan zenean, han ez zegoen erreferente marikarik. Maskulinitateak hegemonikoak ziren. Xabiren ustez, onartuago zegoen emakumeak maskulinoagoak izatea, artean feminismoak jada egina baitzuen ibilbide luze bat. Hori dela eta, uste du emakumeak ahaldunduago zeudela garai hartan sexu askapenerako zeuden taldeak baino.
03 EHGAM 90eko hamarkadan eta COFHLEE (gaztelaniaz)
EHGAMen sartu zenean han zeuden marikak izendatu ditu, eta adierazi digu A La Carga zela garai hartan zeuden giroko tabernetako bat. Egoitza Komite Internazionalistak elkartearekin partekatzen zuten. Bereziki, diskriminazioaren aurkako kanpainak egiten zituzten, jarrera iraultzailearekin beti, beste kolektibo batzuekin batera. Xabiren ustez, EHGAMek eredu erradikala hartu du betidanik, mundua marika bihurtzeko xedea izaki. COFLHEE koordinakundeak baterako kanpainak egiten zituen Estatuko hainbat lekutan bilduta.
04 Bollerak EHGAMen (gaztelaniaz)
Lehen, bollerak zeuden EHGAMen. Gay terminoa argitu digu. Iruñean, zenbait emakume EHGAMetik atera eta Lumatza sortu zuten. Beste batzuek, ordea, nahiago zuten EHGAMen geratu. Xabiren ustez, nola gune bereiziak hala elkarguneak sortu behar ziren.
05 EHGAMen euskal nazio ikuspegia (gaztelaniaz)
EHGAM kolektiboak euskal nazioaren ikuspegia du, eta beti egon dira elkarrekin, nola edo hala, EHGAMek Euskal Herriko lurralde bakoitzean izan dituen ordezkaritzak, nahiz kolektibo bakoitzak ez duen indar bera izan beti. Nafarroaren kasuan, garai batean beste talde batzuekin elkartuta egon zen EHGAM, hala nola Kattalingorrirekin. 90eko hamarkadaren hasieran egon ziren denak elkarrekin hein handienean, EHGAMen Bilbon izan zuen lokalari esker; izan ere, han, Txokolandan, elkartu ohi ziren edariekin dirua atertzeko. Kanpainak egiteko ere koordinatzen ziren. Denbora igaro ahala, talde bakoitza pentsamendu eta diskurtso berriak sartuz joan zen; are gehiago, desadostasun garrantzitsuak egon ziren, bereziki, queer teoriari zegokionez.
06 Presentzia transmarikabolloa Euskal Jai gaztetxean (gaztelaniaz)
Euskal Jai Gaztetxean bollera eta marika ugari egoten ziren. EHGAMek gauza politiko gisa lantzen zuen identitatea, eta ez gauza esentzialista gisa. Gaztetxean hitzaldiak eta jaiak antolatuz LGBTI mugimendua gaztetxera hurbildu eta arau heterosexualarekiko haustura sortzen zuten, non EHGAMek lagundu egiten baitzuen ulertzen heteroarauak sexualitatea ere zuzentzen zuela.
07 Maila diskurtsiboan. Identitate eztabaidak eta queer teoria (gaztelaniaz)
EHGAMek ikuspegi erradikal eta iraultzaile batekin egiten zion aurre sistema kapitalista heteropatriarkalari. Arauz kanpo kokatu izan dira beti, eta komentatu digu horregatik eragin zituela desadostasunak queer teoriak taldearen barnean. Hortik lantzen zuten identitatearen gaia, bereizketa argi batekin: batetik, funtsezko identitatea; bestetik, identitate estrategikoa. Ez zuten gay izan nahi arau heteropatriarkalei jarraituz. Teoria horri esker, halaber, ulertzen da gay kolektiboa ez dela zapalkuntza pairatzen duen bakarra, baizik eta dibertsitate handiko multzo bat dela biktima. Jarrerak bizipenarekin lotuta daude, jakina, baina sozialak ere badira, eta horregatik egin izan du beti EHGAMek hausturaren alde.
08 Mugarri historikoak (gaztelaniaz)
Stonewallen aurretik, bi mugimendu oso garrantzitsu egon ziren. Lehena Alemanian gertatu zen, non homosexualen eskubideen aldeko zenbait pertsonak lege homofoboak indargabetzeko borroka egin baitzuten; besteak beste, Magnus Hirschfeld eta Havelock Ellis dira aipagarriak. Sakondu egiten du horretan. Bigarrena Europan eta Estatu Batuetan sortu zen, homosexualitateari osagai sexuala kentzeko asmoz. Geroago, Stonewalleko matxinadak hasi ziren, eta handik Euskal Herrira ere iritsi zen mugimendua. Diktaduraren amaierako testuinguru historikoan eta gizarte arriskugarritasunaren legearen aurkako militantzian ere sakondu du. Aurrerago, diskriminazioaren aurkako kanpainak antolatzen hasi ziren, hainbat diskurtso bereganatu zituen mugimenduak (jarrerak gero eta erradikal eta iraultzaileagoak ziren), beste borroka batzuekin bat egin zuen eta queer teoria ere sartu zen. EHGAM eta Kattalingorri, Lumatza eta Ilota Ledo. Uste du trans mugimendua dela jazoera berri garrantzitsuetako bat. Xabiren hitzetan, homosexualitatearen historia oso luzea da, antzinako Egiptoren garaiko erreferentziak existitzen baitira, antzinako Grezian eta Erroma klasikoan arautu nahi zelako zantzuak egoteaz gain.
09 Kartzela eta homosexualitatea (gaztelaniaz)
Frankismoan homosexualek jasandako irainak aipatu ditu, pasiboak eta aktiboak bereizten zituztela, eta ezkerreko alderdiren bateko kide zirenek are jazarpen handiagoa pairatu ohi zutela. Xabik kartzelan izandako esperientzia bestelakoa izan zen.
10 Feminismoa eta LGTB mugimendua (gaztelaniaz)
Feminismoarekiko aliantzak onak izan dira. Iruñean egon den feminismoak askatasun sexualen aldeko borroka hartu du. Mugimendu feminista zabalagoa da, baina LGTBI mugimenduak ere jasotzen duen teoria da azken batean: gizonen eta emakumeen arteko harremana –bi kategoria horien artekoa– zalantzan jartzea. Feminismoak diskurtsoa dakar, hots, nola sortzen diren identitateak, kategoriak eta horien arteko harremana. Hori guztia lagungarria izan da LGTB kolektiborako, bera ere zeharkatu egiten baitu.
11 Erakundeak, errepresioa, erreparazioa, genealogia eta politika publikoak (gaztelaniaz)
Erakundeek gizarte mugimenduei dagokienez duten funtzioari buruz zer deritzon azaldu digu Xabik. LGTB kolektiboaren aurkako diskriminazioaz hitz egin digu, eta erreparazio politika publikoak behar direla aldarrikatu du. Memoria historikoaz ere hitz egiten digu, genealogia egin behar dela nabarmenduta. Erreparazio lan gehiago eskatu du, baina ez bakarrik frankismoan gertatu zenari dagokionez, horren ondorengoaz inork ez baitu arazoa bere gain hartu. Mugimenduak autonomia handia izan du, eta, kanpo laguntza izan badu ere, pertsonak izan dira mugimenduan lan egin dutenak.
12 Heteroaraua
Heteroaraua erregimen bat da, arau pila dituena. Hori leuntzen saiatzen dira, beraien nahiak eta bizitzak askatasun gehiagorekin bizitzeko. Beraien borrokaren helburuetako bat arau horietatik ateratzeko zirrikituak sortzea izango litzateke, ahal den hobekien bizitzeko.
IRIS DOMÍNGUEZ CATENA
01 LGTBIQ+ Legea eta osasun arreta (gaztelaniaz)
Aktibismoaren une hartan garrantzitsuena LGTBI Legea izan zen. Trantsizioen arazo handiez hitz egin digu, batez ere osasun arretaren inguruan. Sexologoekin eta gurasoen elkarteekin izaten diren eztabaidez ere hitz egin du.
02 Transexualen eta transgeneroen arteko aldea (gaztelaniaz)
Transexual hitzaren eta transgenero terminoaren artean badaude aldeak. Trans hitza irekiagoa da. Bi terminoen arteko bereizketa ez dago oso onartuta kolektiboaren barruan. Bi terminoak testuinguruan kokatu ditu Irisek, eta bereizketa horrek eztabaida asko sortu dituela azpimarratu du.
03 Malgutasunaren eta genero fluidoaren aurreko jarrera klasikoa (gaztelaniaz)
Taldea oso anitza zen adinari zegokionez: gazteek jarrera malguagoa zuten, eta horrek talka egiten zuen adineko jendearen posizio klasikoarekin; izan ere, adineko gehienek baginoplastia egitea erabaki zuten bere garaian, eta normalkuntza nahi zuten gizartean. Gazteek askoz ikuspegi ez-binarioa zuen, genderfluida. Belaunaldi berriek mundu anglosaxoiko sare sozialetatik ateratzen dute informazioa batik bat; hala, aurkitzen ez dituzten identitateak sentitzen badituzte, asmatu egiten dituzte.
04 8/2017 Foru Legea (gaztelaniaz)
Trans Foru Legea PSOEren proposamen batetik etorri zen. Hainbat alderdi politiko eta LGTB elkarte eta ordezkari elkartu ziren Legea lantzeko. Nafarroan bazen aurreko lege bat, nahiko aurreratua, baina jada zaharkitua. Bi legeei buruz mintzatu da.
05 Zapalkuntza anizkoitzaren sistema eta polimilitantzia (gaztelaniaz)
Trans mugimenduari eta antiespezistari buruz zer deritzon adierazi digu. Edozein aktibistak mugimendu batean baino gehiagotan militatzera jotzen duela nabarmendu du, borroka guztiak eskutik doazelako. Irisen aburuz, arauaren eta gizarteak ezarritakoaren aurka bazoaz, errazagoa da alde batetik baino gehiagotatik ateratzea. Aktibistak prest egon ohi dira sistemari aurre egiteko, gorputza jartzeko horren alde eta gizartearekiko erantzukizuna izateko. Zapalkuntza patriarkalaren sustraiaz eta gizarte mugimenduaren aktibismoak duen benetako arimaz ere hitz egin digu, erakundeak eta bulegoak alde batera utzita.
06 Feminismoa eta LGTB mugimendua (gaztelaniaz)
Irisen feminismoa erabat elkartuta dago trans mugimenduarekin. Emakume trans gisa armairutik irten zenean, feminismoan militatzeko gogoa zuen, baina sentitzen zuen ez zuela autoritaterik «besterik gabe» emakume sentitzeko. Hausnartu eta feminismoan pertsona gisa lekua hartzeak zalantzak eragiten dizkiola adierazi digu, pertsona ez binarioa denez, ez duelako nahi beste pertsona batzuen borroka zapaldu. Gutxi gorabehera feministatzat jotzen du bere burua, nolabait esateko. TERFekin hitz egin izan du. Irisen ustez, arazoa zera da, batzuetan ez dakigula elkarlana koordinatzen eta jendeak hiztegi desberdinak baliatzen dituela.
07 Mugarriak eta mugimenduaren bilakaera (gaztelaniaz)
Irisek LGTBI mugimenduaren mugarri nagusiak azpimarratu ditu, hala nola terminologiaren bilakaera. Kultura desberdinetan sexu orientazioak duen presentziari buruz hitz egin digu. Terminologiari buruz zer deritzon azaldu digu, baita terminologiak zer sentiarazten dion ere. Stonewalleko altxamenduaz hitz egin du, nabarmenduta Silvia Riverak eta Marsha P. Johnsonek ez zutela beren burua pertsona trans gisa definitzen. Bere ustez, aktibismoak LGB forma galdu eta trans arloan jarri du bereziki arreta. Aldi berean, aktibismo handia dago sareetan eta gutxiago kaleetan. Borrokak zatitzen ari direla uste du, baina queerera –eta orokorrean, transbollomarikara– itzultzeko aldarrikapen bat dagoela iruditzen zaio, Iruñean behintzat.
08 Lokalak (gaztelaniaz)
Aldapa kaleko lokala izan zen Irisek ezagutu zuen lehena. Itxi ondoren, Harrotun biltzen ziren. Udalak hitz emandako lekua bada ere, Harrotuk ez du inoiz oso erabilgarria izatea lortu. Murrizketak aipatu ditu. Kattalingunek ere urtebete darama lokal batera ezin sarturik. Maravillas Gaztetxeaz ere hitz egin digu; izan ere, leku horretan egin zitezkeen gauza gehien, baina modu traumatikoan hustu zuten. LGTB kolektiboentzat etxe bat falta dela sumatzen da.
09 Erreferentzia lekuak (gaztelaniaz)
Okupatutako guneez hitz egin digu, hala nola Maravillas Gaztetxeaz. Beste gune autogestionatu batzuetan ere egon da Iris. Cruisingerako leku bat autobus geltokia eta hilerriko aparkalekua izan daitezke. Gazteluko plazako kioskoa erreferentziazko lekua da manifestazioetako manifestuak bertan irakurtzen direlako.
10 LGTB borroka (gaztelaniaz)
LGTB borrokaren mugimendua, egiatan, marjinetatik gauzatzen da eta bizitza sinplea daramaten zishetero dirudunen harrotasunari eragiten dion. Ikusgarritasun eta indar handiko borroka dela uste du, sistemarentzat deserosoa eta xelebrea. Espazioa bisualki okupatze horrek indar handia izan du mugimendurako, baina azkenaldian botere politiko-ekonomiko handiak kooptatzen hasi da. Sigla berriak ikusarazi ahala, erlazionatzeko modu berriak eratzen ari dira, oso indar handikoak.
11 LGBT mugimendurako erronkak (gaztelaniaz)
Mugimenduak oraindik ere erronka nagusi bat du: ez dadin gauza arrunt bihurtu eta kapitalismoa ez dadin jabetu kolektiboaz eta haren borrokaz. Botere politiko eta ekonomikoek ez dezaten gauza estetiko huts bihurtu, gauza mainstreama. Irisen ustez, garrantzitsua da, hori galarazteko, ulertzea borroka deserosoa izan behar dela, eta erne begiratzea sistemak ez gaituela xurgatzen.
RAUL LÓPEZ EKAI
01 COFHLEE eta Gizarte-Arriskugarritasunaren Legea
Koordinaziorako erraminta gisa COFLHEE aipatzen du, bai eta garai bateko MELH, eta Armand de Fluvià, EHGAM eta Gay Liberation Front bezalako beste kolektibo batzuekin batera. Parisko 68a eta Londres input gisa hartuak izatea ikuspuntu marxista garrantzitsutzat hartua izatea ekarri zuten. Gizarte-Arriskugarritasunaren Legearen aurkako kanpainaren baitan Iruñeko San Nicolás-en jarritako pankarta gogoratzen du.
02 Eslaba Kaleko lokala
03 Lumatza
04 EHGAM taldearen izaera eta antolaketa
05 Intsumisioa, queer teoria eta kapitalismoa mugimendua xurgatzen
Intsumisio garaiko lema ere aipatzen du eta horrekin izandako arazoak Iruñan, bereziki emakumeekin, “marikon” hitza erabili izanagatik. Queer teoriari egiten dio erreferentzia, bai eta Estatu Batuetako beltzen borrokari. Kapitalismoa LGTB borrokaz baliatzen hasi zeneko garaiak ekartzen ditu gogora eta gai hitza kuestionatzen hasten dira. Catalunyako FAGC-ari buruz hitz egiten du. Euskal Herrian eta bereziki Nafarroan errepresioa askoz bortitzagoa zela azpimarratzen du. Guzti horren harira bizkaitarrekin arazoak izan zituzten.
06 Beste kolektiboekin harremana, herriak eta sexilioa
07 Talka ideologikoak
Hasieran talka ideologiko txikiak izan zituzten antimilitarismoaren kuestionamendu handia baitzen abertzaletasunetik estrategia militarrarengatik apustua egiten zelako. Era berean, oso ezkerrekoa zen jendearen barruan eredu heteropatriarkala erabat barneratua zuelako. Arrazoitu egiten du. LKIri buruz hitz egiten du.
08 Alfer eta Maleanteen Legea, kontzentrazio eremuak eta errepresioa
09 Nafarroako mugimenduaren hastapenak
10 Aurrekari eta mugarri politikoak
11 Mugimenduaren lorpen eta ekarpenak
12 El ser marica es un estado de conciencia revolucionario
ANA JAKA GARCÍA
01 Erreferente bila
Erreferentziak ikusten hasi zen arreta jartzen hasi zenean. Homosexualek, bilatu egiten dituzte. Jende askori entzun dio hori esaten eta berari hori gertatu zitzaion. Adibide bat ematen du. Baina hala ere, jakin nahi zuen, erreferentziak bilatzen zituen.
02 Harremanak beste taldeekin
Iruñeko beste taldeekin bazituzten harremanak. Hasieratik Kattalingorriko kideekin; Bilgune Feministarekin; Lamiak-ekin; Subeltzeko jendearekin; NUPeko Asanblada Libertarioarekin; EGHAMekin; Hormiga Atómicako jendearekin ere ekintzak burutzen zituzten; Eguzki Irratia… Ekainak 28ko plataforman bi urte oso indartsuak egon ziren eta bertan ezagutu zituzten Médicos del Mundo, Sare… Nafarroan, Iruñetik kanpo, bazeuden taldeak ere. Adibidez, Leitzan bazegoen LGTB talde bat eta Lumatza bezala joan ziren elkarlanerako. Garesen ere bazegoen eta baita auzoetan ere. Feministekin ere elkartzen ziren. Txoko Feminista sortu zenean, talde feminista askorekin egon ziren: Andrea, Emakume Internazionalistak, Txantreakoak, Atarrabiakoak, Hagin, Bilgune Feminista… Lehenago ere egiten zituzten elkarlanak feministekin baina 2012an Txoko Feminista sortu zenean, feminista gehiagorekin elkartzeko aukera eman zen.
03 Euskal Herriko taldeekin harremanak
Euskal Herriko beste taldeekin ere bazituzten kontaktuak. Donostiako Medeak taldea aipatzen du, bai eta hiri berdineko Feministaldia. Bilboko Sare Lesbianistakoekin ere elkartzen ziren edo Gasteizeko Siete Menos Veinte taldea. Talde batek zerbait antolatzen zuenean beste taldeak joaten ziren parte hartzera eta harremanak sortzen ziren. Aktibismo lesbianoan, edo bolleroan, ulertzen da pertsonala dena politikoa ere badela eta ideia horretatik harremanak sortzen joaten dira.
04 Espazio ez-mistoak
Zenbaitetan beharrezkoak ikusten ditu espazio ez misto horiek, espazio bat izateko edo ahotsa izateko normalean ez dutenek. Arrazoitu egiten du eta pribilegioaz hitz egiten du, bai generoaren, arrazaren zein identitate sexualaren aldagaiak aipatuz.
05 Mugimendu transa
Hasiera batean ez zegoen jende trans asko Iruñeako mugimenduan. Ilota-Ledo taldeko Ivan zegoen eta geroago agertu ziren beste batzuk, baina ez ziren asko. Horregatik, transexualitatearen agenda saiatzen ziren beraiek betetzen eta aldarrikatzen. Despatologizazioren aldeko manifestuak egin zituzten, elkarretaratzeak, zine forumak… Lumatzatik ulertu izan dute transexualitatea lesbianen errealitatetik oso gertu dagoela. Bai transak eta bollerak generoaren dikotomia horren aurkakoak direla uste du. Bien arteko muga labainkorra dela ikusten du, momentu batean beraietako edonor trans gisa identifikatu daitekeelako. Egun transak tokia hartzen ari direla uste du. Iruñean mugimendu indartsu bat dagoela aipatzen du. Baina garai batean ez zegoenez, hutsune hori betetzen saiatzen ziren.
06 Mugimenduaren hainbat lema
Ekainak 28 plataformako hainbat lema azaltzen ditu, hala nola: “Visibles, diversas y saludables. Gora gu eta gure gorputzak” eta “Contra los recortes, tijeretas. Gure gorputzak ez dira murrizten” 2011 eta 2012. urtekoak hurrenez hurren. Hurrengo urteetan ez zuen parte hartu, baina aipatzen ditu zenbait manifestazioetan erabilitako lemak, hala nola, “Fuera los rosarios de nuestros ovarios”, “Erasorik ez erantzunik gabe”, “Estamos hasta el culo de tanto machirulo”, “La familia nuclear es radioactiva”, “No son recortes, son ejecuciones”, “Si nos recortan a una nos recortan a todas”, “Tambien hay lesbianas detras de las ventanas”, “Placer anal contra el capital”, “La Ley de Extranjeria para la Reina Sofia”, “Cuidado, os avisamos, somos muchas más que cuando empezamos”, “Placer clictoriano contra el Vaticano”, “El eje del mal es heterosexual” edo heteropatriarcal edo cisheteropatriarcal, bere hitzetan.
07 Lumatzaren kokapen diskurtsiboa eta praktika
Opresio sistema kontzeptualizatzeko diskurtsiboki ezkertiar bezala kokatzen ziren, baita lesbofeminista edota agian gehiago transfeminista bezala ere, genero binarismoaren aurkako diskurtsoa egiten zutelako. Antikapitalista bezala ere identifikatzen ziren. Adibideak ematen ditu. Ekintza eta ideologia batera joaten zen eta horregatik, proposamenek beti izaten zuten diskurtsoa eta praktika. Pribilegioen aurkako borroka horretan kokatu izan dira beti, ikusiz nor dagoen baztertuago eta borrokatuz pertsona guztiak maila berdinean kokatzen dituen jendarte baten alde. Horregatik, taldearen funtzionamenduak horizontala izan behar zuen, integratzailea, inor kanpoan uzten ez zuena. Demokrata izatetik asanblearioa izatera pasatu zen eta hori aldaketa handia izan zen berarentzat. Gehiengoaren erabakiak ez du balio izaten guztientzat, bazterrean daudenak kanpoan geratzen direlako beti. Eta hau ez zen diskurtsoa bakarrik, taldean praktikan jartzen zuten.
08 LGTBI mugimenduaren historia
Stonewall-eko matxinada aipatzen du. Judith Butler-en liburua oso garrantzitsua izan da beraientzat. Lekarozko topaketak ere azpimarragarriak dira. Erreferentzia historikoak askotan galdu egiten direla uste du. Berak ezagutzen dituen lesbianen artean, ez badira lesbiana “intelektualizatuak”, ez dago erreferenterik, ez dira ezagutzen. Gaur egun ere horrela dela eta ez dela historia hori biltzen aipatzen du, beharrezkoa izanik. Emakumeon historia edo “Herstory” delako hori ere ez da ezagutzen, nahiz eta behin eta berriz saiakerak egon, galdu egiten da. Eta oraindik gehiago LGTBIQ historiarekin, Stonewall-eko gertaerez aparte gauza gutxi ezagutzen delako, nahiz eta egon diren beste asko. Bakoitzak modu oso pertsonalean bizi izan dituztela uste du. Berak gogoan du Lekaroz eta bera bezala beste hainbatek ere, baina hemendik urte batzuetara inor ez dela gogoratuko hori gertatu zenik azaltzen du. Berari ere, egindako gauza askoren artean, naiz eta oso garrantzitsuak izan, horietako batzuk ahaztu egin zaizkio. LGTBIQ historia zerbait pertsonala bezala ikusten da, indibiduala, eta ez zaio tokirik egiten historian.
09 Intersekzionalitateaz
Martxoaren 8an Lumatzak parte hartzen zuen eta beti saiatzen ziren beraien aldarrikapenak sartzen. Lumatzaren helburuetako bat besteen borroketan egotea ere izan da. Izan ere, mugimendu bat feminista baldin bada, izan beharko luke lesbianista ere. Antiarrazista bada, badaude lesbiana antiarrazistak ere. Hau da, beraientzako helburu bat zen gurutzaketa horiek zeudela adieraztea eta jendarteratzea. Eta horregatik, ahal zuten mugimendu gehienetan egoten ziren.
10 Lumatza perspektiban
Oso harro dago Ana Lumatzaz. Erreferente izan ziren gai askotan: generoaren inguruan, lesbianen presentzia publikoan, gorputza… Lorpen handienen artean eztabaida batzuk mahai-gaineratu izana dagoela uste du, hala nola lesbianismoaren alde politikoa. Momentu oso politikoa izan zen non gorputza politikoa bihurtu zuten, baita desioa, generoa eta bizitza pertsonala ere, agenda politikoan jarriz. Azpimarratu nahi du ere beste taldeekin egindako elkarlana, hala nola, antiarrazistekin, transekin, libertarioekin… Ez zen bere lana bakarrik egiten zuen bollera talde bat.
11 Desadostasunak eta frikzio-puntuak
Aurkaritzat Opus eta Eliza zuten. Hala ere, E28 Plataforman manifestua gogor eztabaidatzen zen. Transen gaian Ilota Ledo taldearekin izan zituzten eztabaidak, hauek esentzialistagoak zirelako eta beraiek, aldiz, generoa modu ez bitarrago batean ikusten zutelako. Despatologizazioaren gaian ere egoten ziren desadostasunak, tratamenduak lortzeko zailago baitzen despatologizatzen bazen, ez zelako gaixotasun moduan ikusten eta, orduan, ez zuten tratamendurik ematen. Egun ikusi da ez dagoela arazoa honen inguruan, gauza batek bestearekin ez duelako zerikusirik. Médicos Del Mundorekin prostituzioaren gaiarekin izaten zituzten eztabaidak, hauek abolizionistak direlako. Lumatzaren barruan izaten zituzten eztabaidak eta positibo moduan ikusten ditu.
12 LGTBI mugimenduaren aportazioa
Mundu honek muga asko ditu, dena sailkatuta dago, emakume, gizon… LGTBIQ mugimenduak horrekin apurtzen du. Mundu ikuskera anitz eta aberats hori munduari erakustea da aportatzen duen gauzarik garrantzitsuena. Hau, behin eta berriz aldarrikatzen egon behar dute, denbora guztian ukatua izaten delako.
MARCO PÉREZ MATEO
01 EHGAMen itzulera eta Lumatzaren sorrera (gaztelaniaz)
EHGAM Bilbon sortu zen lehenik, eta Iruñera iritsi zen geroago. 1988an, EHGAM deseginda zegoen jada, baina Marcok, beste kide batzuekin batera, berreskuratu egin zuen. Nola sortu zen eta zer nolako antolaketa beharrak zituzten kontatu digu. COFHLEE erakundeaz ere hitz egin digu, nola hasi ziren lanean estatu mailan. EHGAM eta osatu zituzten lesbianei eta Lumatzari buruz ere hitz egin du, baita Koordinakunde Feministaren barruan zeuden emakumeei buruz ere.
02 EHGAMen hastapenak, lokalak eta aliantzak (gaztelaniaz)
Nafarroan, EHGAMi kalea interesatzen zitzaion, eta mugimenduaren diskurtso iraultzailea gizartean egon zedin nahi zuten. Hastapenak eta lehenengo batzarrak nolakoak izan ziren kontatu digu. Zer lokaletan egon ziren aipatu du, zein talderekin partekatu zituzten lokal horiek, baita elkarrekin zer aliantza egin zituzten ere.
03 Amerikaren kolonizazioaren bosgarren mendeurrena (gaztelaniaz)
89an hasi ziren lanean eta atsedenik gabeko jarduerak egiten. 1992an, Amerikaren okupazio eta genozidioaren 5. mendeurrenean, jada lan handia zuten eginda, eta oso interesgarria izan zen kanpaina batekin ospatu zuten urteurrena. Kanpaina guztiak COFHLEErekin batera egiten zituen EHGAmek, estatu osoan zehar sustatze aldera, adibidez, apostasiaren aldekoa edo Renferen aurkako bat.
04 Apostasiaren aldeko kanpaina (gaztelaniaz)
Apostasiaren aldeko kanpaina Bilbon sortu zen, Elizaren adierazpen homofoboen aurka. Lan handia egin ondoren, Artzapezpikutzarekin hitz egitea lortu zuten. Eliza erakundetik ateratzea lortu zuten. Oso arrakastatsua izan zen kanpaina, talde bakar batek ere ez zuelako aurretik halakorik lortu.
05 Eliza, preserbatiboa eta HIESaren aurkako borroka (gaztelaniaz)
Behin, pintadak egin ziren Gotzain Jauregian, Elizaren adierazpenak gaitzesteko. Taldeak kaleko aldarrikapenei ahotsa eman nahi zien. Azaldu du ACT UP Paris (AIDS Coalition to Unleash Power) mugimenduaren eragin handia izan zuela EHGAMek. Marcok nabarmendu du zenbait ekintza oso esanguratsu egin zirela Eliza konplizea zela salatzeko.
06 EHGAM, ekintza talde bat (gaztelaniaz)
Abenduaren 1a beti izan da egun garrantzitsua ekintzetarako. Marcoren hitzetan, EHGAMi beti axola izan zaio gehiago kalera irtetea borroka ikusarazteko, diskurtsoaz kezkatzea baino. Urte batean, erabaki zuten Sarasate pasealekua kondoiz betetzea eta “sida = vida” (hiesa = bizia) zioen pankarta bat zintzilikatzea Foruen monumentutik. EHGAMen mezuak oso indartsuak ziren eta komunikabideetara ere iristen ziren.
07 Taconerako cruising-a eta eraso homofoboa (gaztelaniaz)
«La Condoneta» kanpaina cruisingerako guneetan eta giroko tabernetan kondoiak banatzean zetzan, EHGAMen eta Hiesaren Aurkako Batzordearen egindako aliantzari esker. Jendea gaiaren inguruan kontzientziatzea zen jomuga. Taconeran eraso asko egoten zirela adierazi du Marcok, baina bakar bat salatu zela, 1992an, EHGAMeko bi pertsonak erasoa ikusi zutelako eta prentsan ere atera zirelako. Oihartzun sozial handia izan zuen, eta Foru Parlamentutik ere igaro zen.
08 Renferen aurkako kanpaina (gaztelaniaz)
Urte horietan kanpaina ugari egiten ziren LGBT pertsonen eskubideen aurkako gertakari guztiak salatzeko. Oso militantea zen jendearen jarrerari buruz hitz egin digu Marcok, baita etxerik gabeko pertsonei eta homosexualei sarbidea ukatzeko filtratu zen dokumentu baten ondoren sortu zen kanpainari buruz ere. Estatu mailako koordinazioa lagungarria zen albisteak komunikabideetaraino iristea eta erantzuna globala izatea lortzeko.
09 EHGAMen lokalak, 1157 posta kutxa (gaztelaniaz)
EHGAM hainbat lokaletatik igaro zen Kattalingorrirenean finkatu arte. Kanpotik harremanetan jartzeko, egunkarietan argitaratzen genuen posta-kutxa bat baliatu behar zen. Prozesuetan elkarri laguntzen zioten, eta jendea militatzera bultzatzeko jomuga ere bazuten, nahiz eta mundu guztiak ez zuen politika iraultzailearen parte izan nahi.
10 Kapitalismo arrosa (gaztelaniaz)
«Borrokarako gai; intsumisioa» goiburua erabiltzen zuen kolektiboak goranzko bidean zegoen mugimendu hura ordezkatzeko, eta ez zion bere askatasun guztien alde borrokatzeari utziko, gizartea gero eta gehiago ari zelako merkantilizatzen, gayekin loturikoa modan jartzen ari zirelako, eta kapitala zati batzuk hartu eta merkantilizatzen ari zelako; hori guztia ikusirik, EHGAM gai izan zen gertatzen hasi zen hori kritikatzeko.
11 Gaueko lokaletan egotetik kaleak erreklamatzera (gaztelaniaz)
Marcok gogorarazi digu EHGAMen militantzia hasi aurretik LGBT jendea ghettoetan ibiltzen zela: taberna jakin batzuetan, gaueko lokaletan, etab. EHGAM sortu zenean, hori erabat aldatu nahi izan zuten: kolektiboa kalean ikusgarri izan zedin lortzea. Kaleko tokiak konkistatu behar izan zituzten nola diskurtsoarekin hala gorputzekin.
NINES GARCÍA MONTALVO
01 Militantziaren eta harreman sexoafektiboen hastapenak (gaztelaniaz)
Nines frankismoaren amaieran hasi zen militatzen, eta orduan hasi zen, baita ere, harremanak izaten. Panfletoak klandestinitatean egiten ziren. Bollera gisa identifikatzen ziren emakumeak, hasiera batean, alderdi politikoen barruan antolatzen hasi ziren, baina berehala sentitu zuten bollera gisa antolatu behar zutela. Tuterako barraka baten aurrean musukatzeagatik zentsuratu egin zituztela azaldu du.
02 Nafarroako Koordinakunde Feminista, EHGAM eta Lumatza (gaztelaniaz)
Tuteran, oso kolektibo aktibo baten kide zen, baina mugitu egin behar zuten Koordinakundean parte hartzeko. Euskal Herri mailan koordinatzen ziren. 1980ko hamarkadaren hasieran lesbiana feministen kolektiboa sortu zen Nafarroako Koordinakunde Feministaren barruan. EHGAMen barruan egon ziren eta ondoren Lumatza sortu zuten 90eko hamarkadaren hasieran. Kontakizun erotikoen lehiaketa bat egin zuten. Azaldu digunez, maiz eztabaidatzen zuten feminista lesbianak ala lesbiana feministak ote ziren.
03 EMK, LKI, legeak eta E28ak (gaztelaniaz)
EMKn eta beste hainbat alderdi politikotan beste sexu orientazio batzuk lantzen hasi ziren. Tuteran, EMKren barraka batean, bi bollera elkarri musukatzeagatik zentsuratu zituzten, eta hori izan zen arazoa lantzen hasteko pizgarrietako bat. Garai hartako legeez hitz egin digu. Stonewall erreferentzia bat zen, urtero, ekainaren 28an, baina jende gehiago joaten zen begiratzera manifestatzera baino, eta horregatik, ekintza txiki bat gauzatu zuten (azaldu egin digu ekintza). Ekainaren 28en bilakaera azaldu du.
04 Jardunaldi feministak (gaztelaniaz)
70eko hamarkadaren amaieran Granadako jardunaldi feministetara joan zen. Bartzelonakoetan eta Euskal Herriko mugimendu feministakoetan ere izan zen. Parte-hartze kolektiboa oso goraipatua eta aktiboa zen. Jardunaldietan eztabaidaren bilakaera ikusten zen eta horri buruz ere hitz egin du. Kim Pérez aipatu du, eta transen inguruko eztabaidak nola hazarazi zuen mugimendu feminista.
05 Tuterako Emakumeen Asanblada, lokalak eta erreferentziak (gaztelaniaz)
Beste kide batzuekin batera Tuterako Emakumeen Asanblada sortu zuen; izan ere, asanblada horrek lanean jarraitzen du egun. Geroago, Nafarroako Koordinakunde Feministaren barruan, Lesbiana Feministen Kolektiboa sortu zuten. Hasiera batean pisu batean biltzen ziren, eta geroago, Batzarrek Navarrerian zuen lokalean. Andraizek ere lokalak uzten zizkien. Hainbat pertsona aipatu eta azaldu digu Bilbora gehiago joaten zirela, zehazki, Txokolandara, Euskal Herri mailako jarduerak antolatzera.
06 COFHLEE (gaztelaniaz)
Unean-unean parte hartzen zuten COFHLEEn, eta elkarrekin jarduerak egiten zituzten. Esan digu Koordinakundeak EHGAMekin batera hartzen zuela parte zenbait ekimenetan; ez du argi Nafarroako Koordinakunde Feministaren barneko Lesbiana Feministen Kolektibotik parte hartzen ote zuten.
07 Terminologia. Marikoi, tortillera, bollo (gaztelaniaz)
“Gay” kontzeptu laburtu bat da, “marikoi” irainaren ordezko hitz gisa. Bi hitz horiek eboluzionatu egin dute, eta errebindikatuak eta onartuak izan dira, baita “bollo” eta “tortillera” ere. Emakumeek “lesbiana” hitzez baino ez zuten identifikatzen beren burua, eta ez “gay” terminoarekin; horregatik, harrigarria da hasieran EHGAMen lesbianak ere egotea. Zenbait goiburuz mintzatu da. “Bollera” terminoa geroago etorri zen.
08 Lesbianen lehen jardunaldiak (gaztelaniaz)
Lesbianen lehen jardunaldiak, Euskal Herriak, 83aren inguruan izan ziren Bilbon. Jardunaldien ondoren manifestazioak antolatzen zituzten. Arabako Lesbianen Asanbladak 90eko hamarkadan antolatzen zituen kanpaldietara ere joaten ziren.
09 Botere sistema (gaztelaniaz)
Mugimendurako, heteropatriarkatua eta familia nuklearra hartu izan dira, betidanik, identitate eta askatasunak zapaltzen dituzten sistematzat. Terminoaz eta sistemaz hausnartu du.